काठमाडौं,२४ बैशाख । सांसदहरुले आइपीओको अनुमतिका लागि धितोपत्र बोर्डले कमिसन माग्ने गरेको बिषयमा छानविन गर्न माग गरेका छन् ।
बुधबार प्रतिनिधिसभा बैठकको आकस्मीक समयमा सांसदहरुले आइपीओको अनुमतिका लागि बोर्डले साना जलविधुत परियोजनासँग ५ प्रतिशत र ठुला आयोजनासँग ७ प्रतिशतसम्म कमिसन माग्ने गरेको भन्दै यस बिषयमा छानविन गर्न माग गरेका हुन् ।
माओवादी सांसद माधव सापकोटाले भरपर्दो संयन्त्र बनाएर बोर्डमाथि छानबिनका लागि रुलिङ गर्न माग गर्नुभयो । कमिसनका कारण बोर्डमा ४३ जलविधुत आयोजनाको आइपीओको अनुमति रोकिएको भन्दै उहाले यो निकै गम्भीर बिषय भएको उल्लेख गर्नुभयो ।
त्यस्तै राप्रपा सांसद रोशन कार्कीले आइपीओको अनुमतिका लागि कमिशन माग्ने बोर्डका प्रमुखलाई कारवाही गर्न माग गर्नुभयो । बोर्डले राम्रोसंग काम गर्न नसक्दा पुँजीबजारमा हजारौ नागरिकको पैसा फसेको र उनीहरुमाथि अन्याय भएको उहाले बताउनुभयो ।
उहाले प्रधानमन्त्रीको अध्यक्षतामा गठन भएको सुशासन आयोगले तत्कालै कारवाही अगाडी बढाउन माग गर्नुभयो । यसअघि जलविद्युत् कम्पनीहरूको प्राथमिक सेयर निष्काशन स्वीकृतिका लागि बोर्डका अध्यक्षले कमिसन मागेको विषय सार्वजनिक भएको थियो ।
